घनघन

घन मंदावले मन धुंदावले
जळ वाकून वाकून ओघळले
झाकलेल्या कळा आत ओढाळल्या
रंग हिरव्यात दाटल्या ऊन सावल्या

झाडपानात सण पळ श्रावण श्रावण
अंग अंगणात चाहुली पागोळल्या
लवे भरून डोळा कणकण हळवेला
एक एकटाच जीव होई खुळा बावळा

पापणीची स्थिती आळवावी किती
ओठ शब्दांसवे चहु ओर नाचती
नागमोडलेली वाट चिंब ओला घळघाट
नव्या नवरीचा थाट जणू हीच पावती


.........................अज्ञात

आर्त

आर्त आहे अंतरीचे जाहलो व्याकूळ मी
भावना लंघून गेल्या प्रीतओल्या संगमी
सावल्या बेधुंद झाल्या कुंद छाया घनतमी
समजले उमजे परी ना प्राण माझे संभ्रमी

गोत हळवे व्यापलेले व्याध सावज उभय मी
गुंतले पाशात दोघे पोत अवघे रेशमी
दाखवे उसवे न कोणी गाठ त्यांची संयमी
वाटकाठांची फुले ही बहर त्यांचा मोसमी

..........................अज्ञात