मीच माझा

मीच माझा स्वर्ग आणि नरकही माझाच मी
स्वाभिमानी गर्व सोबत दंभ त्याचा दर्प मी
वेगळे माझे खुळेपण वेदनेचा अर्क मी
जाणुनी सारे तरीही का मला आतर्क्य मी ??

भावना ना विलगल्या गुंता तयांचा त्यात मी
सोडवे ना ना सहावे बेगडी आक्रंद मी
गाळ रिपुकांचे उजागर वेधतो अंदाज मी
शोधतो निष्फळ तरी पळतोच आहे तोच मी

कोण मी माझे प्रयोजन का कुणा आधीन मी
जन्म वा मृत्यूस कणभर राहिलो कारण न मी
जिंकणे हरणे तथा पातक न पुण्य कुणीच मी
मी कफल्लक परवलंबी अन उगाच मुजोर मी

गीत हे पाळा-मुळांचे गात जळतो आत मी
पल्लवी शाखा विशाखा साचतो खोडात मी
दर्शनी आनंद माझे स्पर्शतो असंमत मी
चंदनी अवशेष छाया वाहतो माझाच मी

……………अज्ञात