वळवथेंब

एक थेंब वळवाचा
अंकुर पुन्हा उजवेल
खपलीखालच्या वळणापाशी
नवा श्रावण हिरवळेल

पाउलवाटांचं काय
पाऊल पडेल तिथे वाट सापडेल
अवखळ खळखळणारं पाणी
ओंजळीत साकळेल

आकाशही मावेल मग त्यात

रुसलेलं गावेल
निर्व्याज पावेल
मावळतीच्या संध्येकाठी
चंद्र चांदणं हसेल


..................अज्ञात

अवचित

झुलले मार्दव झरल्या अगणित; झुळझुळल्या पागोळ्या
एकांती निश्वासांचे झाले अवचित स्वर गोळा
ओठात कुणी पोटात कुणी हृदयात सजविल्या कुणी गंधमय रांगोळ्या
अपघातच हे सुखस्वप्नांचे गतकाळाची ही शाळा

रे कुणी बांधले झोके विसरुन वास्तवातले धोके
वडवानळ झाली पाणी जाळित अंतरातली ज्वाळा
पुंकरले बावरले आठवल्या निखार्‍यातल्या वेळा
पावलांत घुटमळले भिजलेले मन कातर वय सोळा

..........................अज्ञात

रेशमी

स्फुंदणे कोंदणे कोंडलेल्या स्वरांचे
मुके; बोलके आज झाले कसे
मिळाली दिशा बंद वार्‍यास जेणे
उधाणून आले जिणे देखणे

एक होता निखारा उरी कोवळा
स्नेहवातीपरी जाहला मोकळा
साचलेले उतू वाहिले अन तराणे
झणी भंगला दाटलेला गळा

रेशमी कोष अंगी तया लाभले
रोमरंध्रातले क्लेश आलोचले
व्यापलेल्या गळाल्या उणीवा कळा
रास राशीत नाचला कृष्ण सावळा


....................अज्ञात

अनंग

सुगंधी क्षणांचा भोक्ता अनंग
उरी रात्र गाते अरूप अभंग
तरी भुक्त प्राजक्त पायांतळी
चिंब व्याकूळ; देही लपे अंतरंग

सुखासीन माझी कथा पोळलेली
व्यथा रोमरंध्री उगा पाळलेली
जरी मोकळे दृष्य आनंद माझे
तळी दाट रंग; पृष्ठी तरंग

...................अज्ञात

शब्दसावल्या

आलाबाई एकदाचा पाऊस तुझा,...
सैरभैर एकांत माझा,..
झिंगल्या वाटेत सयी सावळ्या-
थेंबाथेंबात डोलु लागल्या बाहुल्या

श्वास रुंदावले गोत नादावले
पावलो पावली चाहुली पावल्या,..
साचलेले तळे जाहले मोकळे-
अंगणी सांडल्या मुक्त शब्दसावल्या


...............अज्ञात