"माया वशी"

साद किमयेची अशी की दूर संधी साकळे
गाज भरतीची जशी छायेविनाही खळखळे
पाश दैवी का म्हणावे ? वा तया माया वशी ?
प्राण छंदी लावते ध्यानी उजागरसे तळे

खोल पाताळी दरी आकाश उन्नत पातळी
ओघ अवखळ ओढ तरिही संथतम डोहातळी
गूढ वलये अक्षरांची छेदताती पोकळी
बाग फुलते रूपगंधित छेडता नस कोवळी

थेंब कमळाच्या दळावर खेळ खेळे ओघळे
स्पर्श अस्पर्शात वाहे गोत त्याचे आगळे
योजना आहे कशी नाते विणूनहि सोवळे
पवन रूपी अंतरी ज्याचे तयासच आकळे

………. अज्ञात