"अधीर"

अधीर डोळे मूक भावना शब्द सांगती भोळे
अनाहताचे साज सोहळे डोहातील वानोळे
युगे साहिली काहिल होउन धुंडाळत पाताळे
वेध वेदना निष्फळ सारे नाळ अंतरी जाळे

दूर चांदवा झुरे एकला सागर तळ पान्हाळे
कळे आकळे नाही काही का मग विणतो जाळे ?
दिशा आंधळ्या स्पर्श आभा; त्या झुळुकेचे डोहाळे
मूढ मती गूढत्व देखणे निराकार ओवाळे

हळवे मार्दव ऊन कोवळे परिघावरती लोळे
स्वस्थ असे काहीच नसे का ? पोत निशेचे काळे
उरी मागते एक कवडसा विवरातिल शेवाळे
मातीच्या भेगाळ कथेने अंबर जळ मेघाळे

………अज्ञात