"अनुशेष"

पाउले चालती दिशांत शोधीत नाती
वेढून विहरतो वारा मेघांवरती
भरकटते तारू अगणित भवरे पोटी
आकाशी डोळा लावुन बसते माती

वृक्षांस कळे हृदयी शकुनांची नीती
मिटल्या पंखांतुन झाकून घेती भीती
थांबतो पवन जळभारित सवे पखाली
जडते झुरते जीवन ओंजळ्भर मोती

मग तृप्त दिलासा पडतो अवचित हाती
अंतरी उमलती तेवत स्नेहल ज्योती
अंबरातळी भवनी स्मरणे सांगाती
अवशेष; विमल अनुशेष, उजळती वाती

………. अज्ञात